საქართველოს ეროვნულ მუზეუმში გამართულ შეხვედრის შემდეგ კულტურის მინისტრმა თეა წულუკიანმა განაცხადა, რომ გელათის სამონასტრო კომპლექსში მიმდინარე სამუშაოებს საპატრიარქო უხელმძღვანელებს. „პირველი არხის” ცნობით, შეხვედრაში ასევე მონაწილეობდნენ საპატრიარქოს წარმომადგენლები, არქიტექტორ-რესტავრატორები, ხელოვნებათმცოდნეები და პარლამენტის კულტურის კომიტეტის თავმჯდომარე ელისო ბოლქვაძე.
„ჩვენი დისკუსია დავაფუძნეთ იმ პრობლემებს, რომლის აღმოფხვრაც გელათის სამონასტრო კომპლექსში ჩემი მინისტრობისას ძალიან აქტიურად დაიწყო. შევთანხმდით შემდეგზე, რომ საქართველოს საპატრიარქო იზიარებს ჩემს ინიციატივას, რომ გელათის სამონასტრო კომპლექსში პრობლემების აღმოფხვრის პროცესს, კონსერვაციის პროცესს და რესტავრაციის პროცესს, როცა ამის დრო დადგება, როგორც კედლის მხატვრობაზე, ასევე გადახურვაზე სრულად სათავეში ჩაუდგეს საქართველოს საპატრიარქო და სამინისტრო აღარ იყოს ამ პროცესში წამყვანი. სამინისტრო იმ ფინანსურ რესურსს, რომელიც თავად უნდა დაეხარჯა, გადასცემს საქართველოს საპატრიარქოს და ის ამ ფინანსური რესურსით შეძლებს, წარმართოს პრობლემების აღმოფხვრის პროცესი, როგორც ძირითადი ტაძრის შიგნით და გარშემო, ასევე სხვა კომპლექსის კომპონენტებთან დაკავშირებით. იქ არაერთი სხვა პრობლემაც არის, რომლების მოგვარების პროცესი დაწყებული გვქონდა და ამ პრობლემების მოგვარებას გააგრძელებს საქართველოს საპატრიარქო“, – წულუკიანის კომენტარს „პირველი არხი” ავრცელებს.
როგორც მინისტრმა აღნიშნა, გელათის საკითხზე დისკუსიის პლატფორმა და ფორმატი იქნება საქართველოს საპატრიარქოში.
გელათის შესახებ ჯერ კიდევ იუნესკოს დასკვნის გამოქვეყნებამდე, სამინისტროს ამ სფეროში პოლიტიკის შემოტანისგან თავის შეკავება ურჩია საპატრიარქომ, რომელმაც გელათზე კვლევის მომზადება სთხოვა ჯერ საერთაშორისო სპეციალისტებს, შემდეგ კი ჩუბინაშვილის ცენტრს.
კულტურის სამინისტრო განცხადებით გამოეხმაურა გელათის მოხატული ტაძრების შესახებ გამოკვლევას, რომელიც გამოაქვეყნა გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის ეროვნულმა კვლევითმა ცენტრმა. სამინისტროს თანახმად, კვლევითი ცენტრი პოლიტიკურ ნიადაგზე უპირისპირდება მინისტრ თეა წულუკიანს.
საპატრიარქომ კი განმარტა, რომ ცენტრმა დასკვნა, რომელსაც სამინისტრომ „პოლიტიკურად ანგაჟირებულ პირთა ჯგუფის მოსაზრებების კრებული” უწოდა, მათი თხოვნით მოამზადა და ამ პროცესს პოლიტიკასთან არანაირი კავშირი არ აქვს.
15 თებერვალს საპატრიარქომ განცხადება გაავრცელა გელათის საკათედრო ტაძრის მდგომარეობაზე და აღნიშნა, რომ კრიზისი 2015-19 წლებში შესრულებული სარეაბილიტაციო სამუშაოების შედეგად დაიწყო.
