საქართველოს ეროვნული მუზეუმის გენერალური დირექტორის მოადგილე თეონა ჯაყელი თანამდებობას ტოვებს. ის საქართველოს კულტურის მინისტრად თეა წულუკიანის დანიშვნის შემდეგ, 2022 წლის მარტიდან მუშაობდა ამ თანამდებობაზე.
“გენერალური დირექტორის მოადგილე მისთვის დაკისრებული ფუნქციების შესრულებით, ხელს შეუწყობს გენერალურ დირექტორსა და დირექტორატს ეროვნული მუზეუმის გამჭვირვალე და ეფექტიან მართვაში”, – ეწერა 2022 წლის 15 მარტს კულტურის სამინისტროს მიერ გამოქვეყნებულ განცხადებაში, რომელიც თეონა ჯაყელის დანიშვნის შესახებ იუწყებოდა.
როგორც რადიო თავისუფლებას ერთ-ერთი წყარო უყვება, თეონა ჯაყელს რამდენიმე თანამშრომლის გათავისუფლება მოსთხოვეს, რასაც მოჰყვა კონფლიქტი მუზეუმის გენერალური დირექტორის მეორე მოადგილესთან, ნიკა ახალბედაშვილთან. ინფორმაციის გადამოწმება რადიო თავისუფლებამ რამდენიმე ადამიანთან სცადა, მათ შორის თეონა ჯაყელთანაც, რომელმაც თქვა, რომ “ამ თემაზე კომენტარს არ აკეთებს”.
მუზეუმის პრესსამსახურის თანამშრომელმა რადიო თავისუფლებას უთხრა, რომ დირექტორის მოადგილის მიერ თანამდებობის დატოვებასთან დაკავშირებით “პასუხს ვერ გასცემდა”, დირექტორმა დავით ლორთქიფანიძემ კი აღნიშნა, რომ ახლა შვებულებაშია, თუმცა ამ ინფორმაციას ფლობს.
კულტურის სამინისტროს პრესსამსახურში წერილობით, ერთი სიტყვით უპასუხეს თეონა ჯაყელის მიერ თანამდებობის დატოვებასთან დაკავშირებით დასმულ კითხვას: “ვადასტურებთ” – აცხადებენ პრესსამსახურში.
ნიკა ახალბედაშვილისა და თეონა ჯაყელის ამ თანამდებობაზე დანიშვნიდან რამდენიმე კვირაში ეროვნული მუზეუმიდან 20-ზე მეტი თანამშრომელი გაათავისუფლეს – ოფიციალურ მიზეზად რეორგანიზაცია დასახელდა. გათავისუფლებულთა შორის იყვნენ ხელოვნებათმცოდნეები, არქეოლოგები, საზოგადოებასთან ურთიერთობის სამსახურის თანამშრომლები, ექსპერტ-მეცნიერების სტატუსით მუზეუმში დასაქმებული ასაკოვანი მეცნიერები.
