სერბებმა ჩრდილოეთ კოსოვოში ხუთშაბათს ბარიკადების დემონტაჟი დაიწყეს, კოსოვოს მხრიდან სერბეთთან მთავარი სასაზღვრო პუნქტის განსხნიდან რამდენიმე საათში. ამ ნაბიჯით დაძაბულობა შემცირდა, რომელიც ბოლო თვეების განმავლობაში მიმდინარეობდა.
სერბეთმა ასევე დაასრულა სამდღიანი სამხედრო მზადყოფნა. ამ ცნობას ადგილობრივი საინფორმაციო სააგენტოები ავრცელებენ. ეს მხარეებს შორის დეესკალაციის მნიშვნელოვანი ნაბიჯი იყო, რომლის გადადგმასაც სერბეთს და კოსოვოს ევროკავშირი და შეერთებული შტატები სთხოვდნენ.
“დიპლომატიამ გაიმარჯვა დაძაბულობის დეესკალაციაში ჩრდილოეთ კოსოვოში. ძალადობა ვერასოდეს იქნება გამოსავალი”, – დაწერა ევროკავშირის საგარეო პოლიტიკის ხელმძღვანელმა ჯოზეფ ბორელმა „ტვიტერზე“. მან დასძინა, რომ ჯერ კიდევ საჭიროა ბელგრადსა და პრიშტინას შორის გადაუჭრელი საკითხების მოსაგვარებლად დამატებითი დიალოგი.
ჩრდილოეთ კოსოვოში მცხოვრები, დაახლოებით, 50 000 სერბი უარს ამბობს პრიშტინას მთავრობის ან კოსოვოს ცალკე ქვეყნის სტატუსის აღიარებაზე. მათ სერბეთში და მის მთავრობაში ბევრი სერბის მხარდაჭერა აქვთ.
გრძელვადიანი დაპირისპირების კულმინაცია მას შემდეგ მოხდა, რაც სერბებმა ჩრდილოეთ კოსოვოში 10 დეკემბერს ყოფილი სერბი პოლიციელის დაკავების გასაპროტესტებლად საგუშაგოები აღმართეს.
