14 იანვარს რუსმა სამხედრომ ყუმბარა ააფეთქა და ხანძარი გააჩინა სამხედრო ობიექტზე ბელგოროდის რეგიონში, უკრაინის საზღვართან ახლოს, რასაც სულ მცირე სამი სამხედრო ემსხვერპლა – ამ ცნობას სახელმწიფო მედია და სხვა სააგენტოები ავრცელებენ. დაიჭრა 16 ჯარისკაცი, რვა სამხედრო დაკარგულია.
ონლაინ გამოცემა Baza წერს, რომ აფეთქება მოხდა კულტურის სახლში, რომელშიც, გავრცელებული ინფორმაციით, მობილიზაციის ფარგლებში გამოძახებული სამხედროები იყვნენ. გამოცემის თანახმად, ერთმა სამხედრომ, ჯერჯერობით დაუდგენელი მიზეზით, ააფეთქა RGD-5-ის ტიპის ხელყუმბარა, აფეთქებამ სამხედრო მასალების დეტონაცია გამოიწვია და ხანძარი გაჩნდა.
რუსეთის მედია წერს, რომ აფეთქება უბედური შემთხვევა იყო, თუმცა ამ ვერსიის გადამოწმება არ ხერხდება.
