რუსი ადვოკატების ჯგუფი პრეზიდენტ ვლადიმირ პუტინს მოუწოდებს შეწყდეს ოპოზიციონერი პოლიტიკოსის, ალექსეი ნავალნის “აშკარა წამება”, იმ ფონზე, როცა ნავალნი პატიმრობაშია და იმყოფება რუსეთის ვლადიმირის რეგიონის კოლონიაში, სადამსჯელო იზოლატორში.
მოწოდებას, რომელიც 16 იანვარს წერილის ფორმით გამოქვეყნდა ტელეგრამის არხზე, წინ უძღოდა რუსი ექიმების ანალოგიური მიმართვა მთავრობისადმი – რომ შეწყდეს ნავალნიზე ზეწოლა.
წერილს ხელს აწერს 14 ადვოკატი, ხელმოწერების შეგროვება გრძელდება.
ნავალნი და მისი ადვოკატი, ვადიმ კობზევი რამდენიმე დღეა ამბობენ, რომ ნავალნის ძლიერი ხველება და მაღალი ტემპერატურა აქვს. კობზევი 10 იანვარს ამბობდა, რომ ციხის მცველებმა უარი განაცხადეს მისი კლიენტისთვის წამლების გადაცემაზე.
