დამამძიმებელ გარემოებაში მშობლების მკვლელობაში ბრალდებულ ყოფილ პოლიციელს, გიორგი (დუჩა) ბეროზაშვილს, თბილისის საქალაქო სასამართლომ უვადო პატიმრობა მიუსაჯა. განაჩენი მოსამართლე ვალერიან ბუგიანიშვილმა დღეს, 23 იანვარს, გამოაცხადა.
შემთხვევა თბილისში, ვაზისუბანში, ერთ-ერთ საცხოვრებელ კორპუსში 2022 წლის 27 აპრილს მოხდა. გამოძიების ინფორმაციით, დამნაშავემ ოჯახის სხვა წევრების სახლიდან წასვლის შემდეგ მძინარე მშობლებს – მამას, ზაზა ბეროზაშვილს და დედას, ლალი თავაძეს – თავის არეში ესროლა. მიყენებული დაზიანების შედეგად ორივე ადგილზე გარდაიცვალა.
“მკვლელობის შემდეგ დ.ბ.-მ კვალის წაშლის მიზნით სახლში ყაჩაღობის ინსცენირება მოაწყო, რის შემდეგ დანაშაულის დაფარვის მიზნით საცხოვრებელ ბინაში ხანძარი გააჩინა და ბუნებრივი აირის ონკანი გახსნა. სამართალდამცველებმა დ.ბ. 28 აპრილს დააკავეს. ბრალდებული დანაშაულს აღიარებს”, – ეწერა 2022 წლის 29 აპრილს პროკურატურის მიერ გავრცელებულ განცხადებაში.
გიორგი ბეროზაშვილს ბრალი საქართველოს სისხლის სამართლის კოდექსის 236-ე მუხლის მე-3 და მე-4 ნაწილებით და 109-ე მუხლის მე-2 ნაწილის „ბ“ და „ვ“ ქვეპუნქტებით და მე-3 ნაწილის „ა“ ქვეპუნქტით წარედგინა (ცეცხლსასროლი იარაღისა და საბრძოლო მასალის უკანონოდ შეძენა-შენახვა-ტარება და უმწეო მდგომარეობაში მყოფი ოჯახის ორი წევრის განზრახ მკვლელობა). ამ დანაშაულისთვის მას 16-დან 20 წლამდე ან უვადო პატიმრობა ემუქრებოდა.
