ოპერაციის შემდეგ რეანიმაციულ განყოფილებაში გადაიყვანეს და ამ დრომდე კრიტიკულად მძიმეა საგარეჯოში სროლის შედეგად დაშავებული 21 წლის ახალგაზრდა კაცის მდგომარეობა. ინფორმაცია მედიას საგარეჯოს “ჯეო ჰოსპიტალის” დირექტორმა, მამუკა ოტიაშვილმა მიაწოდა.
“21 წლის პაციენტს, რომელიც კრიტიკულად მძიმეა, აქვს ცეცხლსასროლი გამჭოლი ჭრილობა მუცლის ღრუსა და მარცხენა ბარძაყის მიდამოში – დაზიანებულია არტერია და ვენა, რომელიც აღვადგინეთ. ამ ეტაპზე განაგრძობს მკურნალობას კრიტიკული მედიცინის დეპარტამენტში”, – თქვა კლინიკის დირექტორმა.
ექიმის ინფორმაციით, საგარეჯოში სროლის დროს დაჭრილი 6 ადამიანი შეიყვანეს მათ კლინიკაში, საიდანაც პოლიციელი გარდაცვლილი იყო, მსუბუქად დაშავებული ერთი პაციენტი სპეციფიკური დაზიანების გამო თბილისში გადაიყვანეს, სამი ადამიანის დაზიანებები კი სიცოცხლისთვის სახიფათო არ არის.
“სამ პაციენტს ჩვენება ჩამოართვეს, ისინი კონტაქტურები იყვნენ. ერთ პაციენტს მსუბუქი დაზიანებები ჰქონდა, რომელსაც ამბულატორიაში ჭრილობა ქირურგიულად დაუმუშავეს, იგეგმება კლინიკიდან გაწერა”, – თქვა კლინიკის წარმომადგენელმა.
წუხელ ღამით, დაახლოებით 00:00 საათზე საგარეჯოში სროლის ხმა ისმოდა. საგარეჯოში “ჯეო ჰოსპიტალთან” სროლის შესახებ ინფორმაცია თავდაპირველად კლინიკის თანამშრომელმა გაავრცელა. ის აღნიშნავდა, რომ იყო მსხვერპლი და ექიმები სროლის გამო ვერ ახერხებდნენ დაჭრილი ადამიანების დახმარებას.
გამოძიების ინფორმაციით, საგარეჯოში 1974 წელს დაბადებულმა ნ.ა.-მ თავდაპირველად საცხოვრებელი კორპუსის ერთ-ერთი ბინის აივნიდან რამდენჯერმე გაისროლა, რის შედეგადაც დაიღუპა 4 და დაიჭრა კორპუსის ეზოში მყოფი 5 ადამიანი.
შინაგან საქმეთა სამინისტროს ინფორმაციით, ბრალდებულმა პირმა ცეცხლი გაუხსნა ადგილზე გამოძახებულ შინაგან საქმეთა სამინისტროს თანამშრომლებს, რომელთაგანაც ერთ-ერთი დაიღუპა. მინისტრმა ვახტანგ გომელაურმა მედიას უთხრა, რომ თავდამსხმელმა სიცოცხლე თვითმკვლელობით დაასრულა.
