თბილისის მერი, კახა კალაძე ამბობს, რომ მუნიციპალიტეტი “ლაგუნა ვერეს” საცურაო კომპლექსს აღადგენს. მერმა თბილისის მთავრობის სხდომაზე მადლობა გადაუხადა საქართველოს ყოფილ პრემიერ-მინისტრ ბიძინა ივანიშვილსა და საქველმოქმედო ფონდ “ქართუს”, ამ ქონების გადაცემისთვის.
“ამ სივრცეს მოვაწესრიგებთ და მოსახლეობასთან ერთად განვსაზღვრავთ, როგორ უნდა წარიმართოს პროცესი. მოვიწვევთ არქიტექტორებს, დიზაინერებს და პროცესში საზოგადოებაც ჩართული იქნება. რაც შეეხება მერიის გეგმებს ამ ობიექტთან დაკავშირებით, მას მოგვიანებით კიდევ უფრო დეტალურად გაგაცნობთ”, – თქვა მერმა.
მან ასევე ისაუბრა “აბრეშუმის ქარხნის” ტერიტორიაზე, სადაც მმართველი პარტიის დამფუძნებლის, ბიძინა ივანიშვილის საქველმოქმედო ორგანიზაცია მრავალფუნქციური ცათამბჯენების აშენებას გეგმავს.
“რაც შეეხება დანარჩენ ტერიტორიას, აქ დგას აბრეშუმის ქარხნის ძველი შენობა, რომელიც, მართალია, არ არის კულტურული მემკვიდრეობის ძეგლი, თუმცა, ქმნის თბილისის ერთგვარ ისტორიულ სახეს. შესაბამისად, გეგმარებისას გაითვალისწინეს ეს ფაქტორი და შენობა არა მარტო შენარჩუნდება, არამედ შეერწყმება დაგეგმილ განაშენიანებას…
არქიტექტურის კუთხით, ჯერჯერობით გრძელდება მუშაობა, რათა კიდევ უფრო დაიხვეწოს პროექტი და მივიღოთ საუკეთესო განაშენიანება. სხვა დეტალებზე თბილისის მერიის შესაბამისი სამსახურები კვლავ განაგრძობენ მუშაობას”, – თქვა მერმა.
რამდენიმე დღის წინ, როცა მედია “აბრეშუმის ქარხნის” ტერიტორიაზე ცათამბჯენების აშენების საკითხით დაინტერესდა, თბილისის მერმა თქვა, რომ ის “ახლის და ძველის შერწყმით განხორციელდება”.
