საქართველოს ეროვნული მუზეუმის გენერალური დირექტორის მოადგილე თეონა ჯაყელი არ იზიარებს იმ საკადრო პოლიტიკას, რომელიც უწყებაშია – ესაა ოფიციალური მიზეზი, რის გამოც თეონა ჯაყელმა თანამდების დატოვება გადაწყვიტა. ჯაყელის წერილი რადიო თავისუფლებას წყარომ მას შემდეგ მიაწოდა, რაც მისი თანამდებობიდან წასვლის შესახებ მასალა მოამზადა.
ჯაყელი 13 იანვარით დათარიღებული განცხადებით კულტურის მინისტრს, თეა წულუკიანს მადლობას უხდის ნდობისთვის, თუმცა განსხვავებული ხედვების გამო ითხოვს დაკმაყოფილდეს მისი თხოვნა თანამდებობიდან გათავისუფლების შესახებ.
“პირველ რიგში დიდი მადლობა მინდა გადაგიხადოთ გამოცხადებული ნდობისთვის სსიპ საქართველოს ეროვნული მუზეუმის გენერალური დირექტორის მოადგილის პოზიციაზე დანიშვნასთან დაკავშირებით.
მოცემულ პოზიციაზე მუშაობის ურთულესი თვეების მანძილზე ჩემი კურატორობით მიმდინარეობდა მასშტაბური საერთაშორისო და ადგილობრივი პროექტები, სადაც საქართველოს ეროვნული მუზეუმის პროფესიონალების გუნდთან ერთად დაიდო საინტერესო შედეგები.
მოცემულ ეტაპზე კულტურის მინისტრის ხედვა მუზეუმის ინსტიტუციურ განვითარებასა და საკადრო პოლიტიკაზე არ ემთხვევა ჩემს პროფესიულ ხედვას. აღნიშნულიდან გამომდინარე ვტოვებ გენერალური დირექტორის მოადგილის თანამდებობას”, – წერია განცხადებაში.
