დავოსში მსოფლიო ეკონომიკური ფორუმის ფარგლებში მყოფი საქართველოს პრემიერ-მინისტრი ირაკლი ღარიბაშვილი სერბეთის პრეზიდენტს ალექსანდრ ვუჩიჩს შეხვდა. მთავრობის ადმინისტრაციის ცნობით, მხარეებმა განიხილეს საქართველოსა და სერბეთის რესპუბლიკას შორის არსებული თანამშრომლობის ძირითადი მიმართულებები და თანამშრომლობის გაღრმავების პერსპექტივები.
„ხაზი გაესვა ორმხრივ და მრავალმხრივ ფორმატებში ორ ქვეყანას შორის არსებულ თანამშრომლობას. საუბარი შეეხო ევროპული ინტეგრაციის საკითხებს. შეხვედრაზე ასევე განიხილეს რეგიონსა და მსოფლიოში არსებული უსაფრთხოების გარემო და გამოწვევები”, – ნათქვამია პრესრელიზში.
პრემიერ-მინისტრმა და სერბეთის პრეზიდენტმა ორი ქვეყნის ტერიტორიული მთლიანობის მიმართ მხარდაჭერა კიდევ ერთხელ დაადასტურეს.
დავოსში ღარიბაშვილი, ასევე, შეხვდა შვეიცარიის კონფედერაციის პრეზიდენტს ალან ბერსეს.
ფორუმის ფარგლებში პრემიერ-მინისტრი დაესწრო დავოსის მსოფლიო ეკონომიკური ფორუმის დამფუძნებლისა და აღმასრულებელი თავმჯდომარის, პროფესორ კლაუს შვაბისა და მისი მეუღლის ჰილდე შვაბის მიერ ორგანიზებულ ტრადიციულ მიღებას.
