უკრაინის შეიარაღებული ძალების მთავარსარდალი, გენერალი ვალერი ზალუჟნი, სამშაბათს პირველად შეხვდა პირისპირ აშშ-ის შეიარაღებული ძალების შტაბების მეთაურთა გაერთიანებული კომიტეტის თავმჯდომარეს, გენერალ მარკ მილის.
შეხვედრის შემდეგ ზალუჟნიმ განაცხადა, რომ მილისთან შეხვედრა პოლონეთში გაიმართა.
„გენერალ მილის მადლობა გადავუხადე განუხრელი მხარდაჭერისა და დახმარებისთვის […] მოვხაზე უკრაინის შეიარაღებული ძალების სასწრაფო საჭიროებები, რომელთა დაკმაყოფილება დააჩქარებს ჩვენს გამარჯვებას,“ დაწერა ზალუჟნიმ „ტელეგრამში“.
გენერალმა მილიმ გუშინ გერმანიაში მოინახულა ბანაკი, რომელშიც ამერიკელი სამხედროები უკრაინელებს წვრთნიან.
20 იანვარს გერმანიაში, აშშ-ის სამხედრო ბაზაზე რამშტაინში, გაიმართება უკრაინის მოკავშირეთა მორიგი შეხვედრა, რომელზეც ითათბირებენ უკრაინისთვის შემდგომი სამხედრო დახმარების გეგმებზე.
