ევროპის ებრაელთა კონგრესმა განაცხადა, რომ შოკირებული და აღშფოთებულია რუსეთის საგარეო საქმეთა მინისტრ სერგეი ლავროვის კომენტარებით და დასავლეთის სახელმწიფოთა მიერ უკრაინის მხარდაჭერის შედარებით ჰიტლერის გადაწყვეტილებასთან, რომელმაც ჰოლოკოსტისას 6 მილიონი ებრაელის მკვლელობა გამოიწვია.
კონგრესის პრეზიდენტმა არიელ მუზიკანტმა ამ შედარებას სამარცხვინო უწოდა და განაცხადა, რომ ეს ჰოლოკოსტის დამახინჯებაა. ევროპის ებრაელთა კონგრესი მოითხოვს, რომ ლავროვმა ბოდიში მოიხადოს და თავისი სიტყვები უკან წაიღოს.
18 იანვარს, მოსკოვში გამართულ პრესკონფერენციაზე რუსეთის საგარეო საქმეთა მინისტრმა განაცხადა, რომ ისევე, როგორც ჰიტლერმა მოახდინა ევროპული ქვეყნების უმრავლესობის მობილიზება, დაპყრობა და საბჭოთა კავშირის წინააღმდეგ მიმართვა, აშშ-მაც შექმნა პრაქტიკულად, ყველა ევროპული ქვეყნის კოალიცია და უკრაინის მეშვეობით ომს აწარმოებენ იგივე მიზნით – „რუსული საკითხის“ საბოლოოდ გადასაწყვეტად. ლავროვის სიტყვებით, ისევე, როგორც ჰიტლერს სურდა „ებრაელთა საკითხის“ საბოლოოდ გადაწყვეტა, დღეს დასავლელი პოლიტიკოსები ცალსახად ამბობენ, რომ რუსეთმა სტრატეგიული მარცხი უნდა განიცადოს.
ეს არ არის პირველი შემთხვევა, როცა რუსეთის საგარეო საქმეთა მინისტრის განცხადებამ ებრაელები აღაშფოთა. 2022 წლის მაისში, იტალიურ ტელეკომპანია Mediaset-თან ინტერვიუში ლავროვმა უკრაინის პრეზიდენტი ვოლოდიმირ ზელენსკი შეადარა ნაცისტური გერმანიის მეთაურ ადოლფ ჰიტლერს და თქვა, რომ ებრაული სისხლი ჰიტლერსაც ჰქონდა.
