“ნაციონალური მოძრაობის” ქუთასის საკრებულოს წევრებმა და პარტიის ქუთაისის ორგანიზაციის წარმომადგენლებმა შიდაპარტიულ არჩევნებში თავმჯდომარის თანამდებობაზე მხარდაჭერა ნიკა მელიას გამოუცხადეს.
განცხადება 15 იანვარს პარტიის ოფისში გამართულ ბრიფინგზე საკრებულოში ფრაქცია “ნაციონალური მოძრაობის” თავმჯდომარემ გიორგი კილაძემ გააკეთა და დასძინა, რომ ქუთაისში იფუნქციონირებს ნიკა მელიას მხარდამჭერი შტაბი.
“ნაციონალური მოძრაობის” ქუთაისის ორგანიზაციის სახელით, სრულ მხარდაჭრას ვუცხადებთ პარტიის მოქმედ თავმჯდომარეს, ნიკა მელიას და წარმატებებს ვუსურვებთ 28–29 იანვარს დაგეგმილ არჩევნებში. მიგვაჩნია, რომ ნაციონალური მოძრაობის თითოეული წევრისთვის დღეს პირველი საზრუნავი მიხეილ სააკაშვილის თავისუფლებაა და 2023 წელს საქართველოში ოლიგარქიული რეჟიმის დასასრულია”, – განაცხადა გიორგი კილაძემ.
ნიკა მელიას მხარდამჭერი შტაბი პარტიის ოფისში იფუნქციონირებს და მას გაგა მანაგაძე უხელმძღვანელებს. მისი განმარტებით, დაწყებულია ენმ–ის მხარადამჭერ მოქალაქეთა რეგისტრაცია, რომლებიც ონლაინ შეძლებენ ხმის მიცემას სასურველი კანდიდატისთვის, რისთვისაც წინასწარ რეგისტრაცია უნდა გაიარონ.
ონლაინ რეგისტრაცია 26 იანვრამდე გაგრძელდება, ტექნიკური პრობლემების წარმოშობის შემთხვევაში კი მოქალაქეებს შეუძლიათ შტაბს მიმართონ, სადაც შიდაპარტიულ არჩევნებში მონაწილეობისთვის რეგისტრაციაში დაეხმარებიან.
როგორც ნიკა მელიას მხარადამჭერ ქუთაისის შტაბში განმარტავენ, თავმჯდომარის შიდაპარტიული არჩევნები ელექტრონული სისტემით გაიმართება, რაც პარტიის მხარადამჭერების სრულ უმრავლესობას მისცემს საშუალებას, საკუთარი არჩევანი დისტანციურად დააფიქსირონ.
“ნაციონალური მოძრაობის” თავმჯდომარის არჩევნები 28–29 იანვარს გაიმართება. თავმჯდომარეობის კანდიდატები არიან, ნიკა მელია, ლევან ხაბეიშვილი, ნონა მამულაშვილი და გიორგი მუმლაძე.
