ჩეხეთის პრეზიდენტობის კანდიდატმა და ყოფილმა პრემიერ-მინისტრმა, მილიარდერმა ანდრეი ბაბიშმა ეჭვ შეიტანა ნატოს საერთო თავდაცვის ვალდებულებაში, რასაც მის მიმართ მძაფრი კრიტიკა მოჰყვა.
ბაბიშს 22 იანვარს გამართულ სატელევიზიო დებატების დროს ჰკითხეს, გაგზავნის თუ არა სამხედროებს პოლონეთში, ან ბალტიისპირეთის ქვეყნებში, თუკი ამ სახელმწიფოებს თავს დაესხმებიან.
“არა, ამას ნამდვილად არ გავაკეთებ. მე მსურს მშვიდობა, არ მინდა ომი. და არც ერთ შემთხვევაში არ გავგზავნიდი ჩვენს შვილებს, ჩვენი ქალების შვილებს ომში” – თქვა მან.
არჩევნების მეორე ტურში, რომელიც 27 და 28 იანვარს გაიმართება, ბაბიშის მეტოქე იქნება ნატოს ყოფილი გენერალი, პეტრ პაველი.
სააგენტო Ipsos-ის მიერ ახლახან ჩატარებული კვლევის შედეგებით, გენერალ პაველს მკაფიო უპირატესობა აქვს, ხმების 58,8 პროცენტით.
