აშშ-ის სამხედრო ბაზაზე გერმანიაში, რამშტაინში 20 იანვარს უკრაინის თავდაცვის საკონტაქტო ჯგუფის – “რამშტაინის” ფორმატში გამართული შეხვედრის შემდეგ, პრესკონფერენცია გამართეს აშშ-ის თავდაცვის მინისტრმა, ლოიდ ოსტინმა და აშშ-ის შტაბების მეთაურთა გაერთიანებული კომიტეტის თავმჯდომარემ, მარკ მილიმ.
ლოიდ ოსტინმა განაცხადა, რომ უკრაინა არ არის დამოკიდებული მხოლოდ ერთ სამხედრო პლატფორმაზე. მისი თქმით, უკრაინამ კონტრიერიში რუსეთის წინააღმდეგ უნდა დაიწყოს წელს გაზაფხულზე და მოუწოდა მოკავშირეებს, მეტი იარაღი მიაწოდონ კიევს, რათა მომზადებაში დაეხმარონ.
„ჩვენ გვაქვს შესაძლებლობების ფანჯარა დღეიდან გაზაფხულამდე …როცა ისინი დაიწყებენ თავიანთ ოპერაციას, კონტრიერიშს,“ – უთხრა მან ჟურნალისტებს რამშტაინის სამხედრო ბაზაზე. „ეს არც ისე დიდი დროა და თავი უნდა მოვუყაროთ ყველა აუცილებელ შესაძლებლობას“.
ოსტინმა ჟურნალისტის შეკითხვაზე, გერმანიის, როგორც მოკავშირის საიმედოობის შესახებ, განაცხადა, რომ გერმანია საიმედო პარტნიორია და ის აგრძელებს ამ მხრივ ევროპაში ლიდერობას მოუხედავად იმისა, რომ უკრაინისთვის ტანკების მიწოდებას არ თანხმდება. ოსტინის თქმით, გერმანია ბევრს აკეთებს უკრაინის დახმარებისთვის, და რომ გარდა მრავალფეროვანი იარაღის მიწოდებისა, წვრთნის უკრაინელ სამხედროებს.
(ახალი ამბები განახლდება)
