თბილისთან ახლოს, სოფელ წინუბანში, ამ სახლში, 29 თებერვალს, დილით მიასვენეს 21 წლის ქეთევან ჯავახიშვილი. ოჯახი სამძიმარს იღებს, ჭიშკარი ღია უნდა იყოს.
გოგო წინა დღით, სახლის გვერდით, დაახლოებით 50 მეტრში, დაუსრულებელი მცირე შენობის საძირკველში იპოვეს გარდაცვლილი. ოჯახის ახლობლები ამბობენ, რომ გოგოს ცივი იარაღით ჰქონდა მიყენებული არაერთი ჭრილობა, ხელები კი რკინის მავთულით ჰქონდა შეკრული.
მკვლელობაში ბრალდებული 21 წლის ოთარ ცინდელიანი რამდენიმესაათიანი ძებნის შემდეგ, გვიან ღამით, ზუგდიდის მუნიციპალიტეტში დააკავეს. ამბობენ, რომ ის მიმალვას სვანეთში ცდილობდა.
პროკურატურამ დაკავებულს ბრალი 29 თებერვალს წარუდგინა. მას გამოძიება გენდერის ნიშნით, განსაკუთრებული სისასტიკით ჩადენილ განზრახ მკვლელობას ედავება:
„შინაგან საქმეთა სამინისტროს მიერ ჩატარებული გამოძიებით დადგინდა, რომ 28 თებერვალს, თბილისში, ბრალდებულმა მეგობარ ქალს დანით სხეულზე მრავლობითი დაზიანებები მიაყენა. მიყენებული დაზიანებების შედეგად დაზარალებული ადგილზე გარდაიცვალა.
დაკავებულს ბრალდება საქართველოს სისხლის სამართლის კოდექსის 109-ე მუხლის „თ“ და „მ“ ქვეპუნქტით (განზრახ მკვლელობა, ჩადენილი გენდერის ნიშნით, განსაკუთრებული სისასტიკით) წარედგინა, რაც სასჯელის სახედ და ზომად 16-დან 20 წლამდე ან უვადო თავისუფლების აღკვეთას ითვალისწინებს“, – წერია პროკურატურის მიერ გავრცელებულ განცხადებაში.
რას ამბობს დაკავებულის ადვოკატი?
ოთარ ცინდელიანის ადვოკატი ანა შიშნიაშვილი ამბობს, რომ მისი დაცვის ქვეშ მყოფი მძიმე ფსიქო-ემოციურ მდგომარეობაშია და ის დეტალებზე ვერ საუბრობს:
„ამ ეტაპზე, იმდენად რთულია მისი ფსიქოლოგიური მდგომარეობა, რომ პოზიციებთან და საქმის დეტალებთან დაკავშირებით ვერ ილაპარაკებს. დაცვის მხარე, სავარაუდოდ, დააყენებს შუამდგომლობას ფსიქიატრიული ექსპერტიზის ჩატარების თაობაზე შერაცხადობასთან მიმართებაში“.
ადვოკატი არ აზუსტებს, მისცა თუ არა ბრალდებულმა ჩვენება გამოძიებას: „სასამართლოში გაჟღერდება ჩვენი პოზიცია“.
რას ამბობს ოთარ ცინდელიანის მამა?
„ტვ პირველისთვის“ მიცემულ ინტერვიუში ოთარ ცინდელიანის მამა ამბობს, რომ მის შვილს ფსიქიკური ჯანმრთელობის პრობლემები აქვს:
„ჩემი შვილი ფსიქიკურად ვერ იყო კარგად ნარკოტიკების გამო და იმიტომ მოხდა ყველაფერი. მკურნალობდა კიდეც ბარსელონაში. ჩემთან ცხოვრობდა, მაგრამ მე სახლში არ ვიყავი და წამოსულა“.
რა მოხდა 28 თებერვალს გამთენიისას სოფელ წინუბანში?
ამ კითხვაზე ზუსტი პასუხი მოკლული გოგოს ახლობლებს არ აქვთ. შვილის ცხედარი, მამამ 28 თებერვალს, დილით ნახა. ახლობლები ყვებიან რომ სხეული დასახიჩრებული იყო.
ადგილობრივები რადიო თავისუფლებას ეუბნებიან, რომ მოკლული გოგო და მკვლელობაში ბრალდებული კლასელები იყვნენ და სკოლის დამთავრების შემდეგაც მეგობრობდნენ. მათივე თქმით, ოთარ ცინდელიანის დედა მოკლული გოგოს ნათლიაა:
„ქალმა გუშინ პოსტიც დადო ფეისბუკზე, ვინ გაგიმეტა მოსაკლავადო, ქეთის მიმართავდა. მაგრამ შემდეგ, როცა გაირკვა, რომ მკვლელობაში სწორედ მისი შვილია ბრალდებული, პოსტი წაშალა“, – მიყვება ქეთევან ჯავახიშვილის მეზობელი.
თანასოფლელები ამბობენ, რომ მკვლელობაში ბრალდებული წლების განმავლობაში დედასთან ერთად, ესპანეთში ცხოვრობდა, თუმცა, რამდენიმე თვის წინ ის საქართველოში დაბრუნდა. დედა ესპანეთში დარჩა:
„ბიჭის დედაც ჩვენი სოფლიდანაა. ოთო აქ გაიზარდა. მშობლები გაშორებულები არიან. მამა სვანეთში ცხოვრობს. დედა ახლაც ესპანეთშია. ბიჭი იანვრის დასაწყისში ჩამოვიდა საქართველოში, აქაც გამოჩნდა, ყველა მოგვიკითხა.
გაოგნებულები ვართ. ითქვა, თითქოს მკვლელობის მოტივი ფულის გამოძალვა იყოო, ნარკოდამოკიდებული იყოო, მაგრამ ჩვენ ამის შესახებ არაფერი ვიცით. ბოლოს იანვარში ვნახეთ და უცნაური არაფერი ეტყობოდა. ისიც ითქვა, თითქოს ახალგაზრდებს ერთმანეთი შეუყვარდათო, მაგრამ დაზუსტებით არაფრის თქმა შეგვიძლია“.
თანასოფლელები ამბობენ, რომ რამდენიმე წელი ესპანეთში ცხოვრობდა ქეთევან ჯავახიშვილის ოჯახიც:
„ოჯახებს ესპანეთშიც მჭიდრო ურთიერთობა ჰქონდათ. სანამ ქეთი და მისი ოჯახი ესპანეთში თავშესაფარს მიიღებდნენ, როგორც ვიცით, მათ ოთარის დედა ეხმარებოდა. ახალგაზრდები იქაც ურთიერთობდნენ. ქეთის მშობლებს მეხუთე შვილი ესპანეთში შეეძინათ, თუმცა, ერთი წლის წინ საქართველოში დაბრუნება გადაწყვიტეს. ქეთის დედას აქ მოხუცი მშობლები ჰყავს და მათ მარტო ვეღარ დატოვებდა“.
როგორც მოკლული გოგოს ახლობლები ყვებიან, ქეთევანი თბილისის საერთაშორისო აეროპორტში მუშაობდა:
„ძალიან განათლებული, ჭკვიანი გოგო იყო. სამსახურში დაწინაურებასაც უპირებდნენ. მეხის გავარდნას ჰგავდა ქეთის ამბავი“.
ფემიციდში ბრალდებული ოთარ ცინდელიანის აღკვეთის ღონისძიების საკითხზე თბილისის საქალაქო სასამართლო პირველ მარტს იმსჯელებს.
2024 წელს ეს არის ფემიციდის მესამე შემთხვევა. 9 იანვრის ღამეს, თბილისში, ვარკეთილში მოკლა ქმარმა 27 წლის ქეთევან ედიბერიძე. რამდენიმე დღით ადრე, ახალი წლის ღამეს, ბათუმში, ქმარმა მოკლა 36 წლის ირმა ბერიძე.
