18 სექტემბერს ჰააგის საერთაშორისო სასამართლო განაახლებს მოსმენებს უკრაინის მიერ რუსეთის წინააღმდეგ გენოციდის კონვენციის საფუძველზე შეტანილი სარჩელის ირგვლივ. უკრაინული მხარე აცხადებს, რომ მის ტერიტორიაზე არ ყოფილა გენოციდი, რომლითაც პუტინი ამართლებს თავის შეიარაღებულ აგრესიას. გარდა ამისა, კიევი თავად ადანაშაულებს რუსეთის ფედერაციას „უკრაინაში გენოციდის აქტების დაგეგმვაში“.
იურისტების განმარტებით, უპრეცეტენტოა ის ფაქტი, რომ სასამართლო სხდომაში დამატებით 32 ქვეყანა მიიღებს მონაწილეობას. DW-ს ცნობით, ამ ქვეყნებს შორის არის ევროკავშირის ყველა ქვეყანა უნგრეთის გარდა; ასევე ლიხტენშტეინი, ნორვეგია, კანადა, დიდი ბრიტანეთი, ახალი ზელანდია და ავსტრალია. სპეციალისტების თქმით, როგორც გენოციდის დანაშაულის შესახებ 1948 წლის კონვენციის მონაწილეებს, ამ ქვეყნებს აქვთ პროცესში სართვის უფლება. წინასწარი ინფორმაციით, ჩართული ქვეყნებიდან პირველი სიტყვით გამოვა გერმანია (20 სექტებმერი).
„გაეროს წევრი ქვეყნების თითქმის 20%-ს სურს განაცხადოს, რომ რუსეთის ფედერაცია სიტყვა „გენოციდის“ იყენებს ნებისმიერი მიზეზით, რითაც ძირს უთხრის ყველაზე მნიშვნელოვან საერთაშორისო კონვენციას“, – ამბობს DW-თვის მიცემულ ინტერვიუში საერთაშორისო სამართლის სპეციალისტი, იურისტი სერგეი გოლუბოკი, რომლის თქმითაც, 2022 წლის 16 მარტს მართლმსაჯულების საერთაშორისო სასამართლომ მოსთხოვა რუსეთის ფედერაციას დაუყოვნებლივ შეწყვიტოს აგრესია უკრაინის წინააღმდეგ.
„ეს არის ომის უკანონობის დამადასტურებელი მთავარი სამართლებრივი აქტი და მას გადამწყვეტი მნიშვნელობა აქვს სპეციალური ტრიბუნალის მომავლისა და მიყენებული ზიანის ანაზღაურების საქმეში“, – მიაჩნია ექსპერტს.
