კრემლმა 5 ივნისს განაცხადა, რომ ეროვნული უსაფრთხოების საკითხებში შეერთებული შტატების პრეზიდენტის მრჩევლის, ჯეიკ სალივანის განცხადება, რომელიც შეიცავს მოწოდებას შეიარაღების კონტროლის ორმხრივი დისკუსიების გამართვის თაობაზე, „დადებითია“ და რომ რუსეთი ღიაა დიალოგისთვის.
სალივანმა 2 ივნისს თქვა, რომ თუ რუსეთი იმავეს გააკეთებს, შეერთებული შტატები დაიცავს ბირთვული შეიარაღების ლიმიტებს, რომლებიც დადგენილია New START-ის ხელშეკრულებით, ცივი ომის ორ მეტოქეს შორის ბირთვული იარაღის შემცირების სფეროში დარჩენილი უკანასკნელი შეთანხმებით, რომელსაც 2026 წელს გასდის ვადა.
თებერვალში პუტინმა ხელი მოაწერა კანონს, რომელიც აჩერებს ქვეყნის მონაწილეობას New START-ში. შეთანხმება არ ითვალისწინებს ცალმხრივ შეჩერებას, ფაქტობრივად, მოსკოვმა უბრალოდ უარი თქვა მის შესრულებაზე.
მაშინ პუტინმა თქვა, რომ ხელშეკრულების განხორციელება შეუძლებელია მანამ, სანამ „დასავლური ელიტები რუსეთის განადგურებას ცდილობენ“. შეერთებულმა შტატებმა გადაწყვეტილებას „დიდი შეცდომა“ უწოდა.
აშშ-რუსეთის ხელშეკრულება, რომელიც პუტინმა შეჩერებულად გამოაცხადა, 2010 წელს გაფორმდა და 2011 წელს შევიდა ძალაში.
ამ დოკუმენტის საფუძველზე შემცირდა ორივე ქვეყნის არსენალში არსებული ბირთვული იარაღი და ბალისტიკური რაკეტები და განისაზღვრა ურთიერთკონტროლის მექანიზმები.
2021 წელს ხელშეკრულების მოქმედების ვადა 5 წლით გაგრძელდა.
