თურქეთის პრეზიდენტმა რეჯეპ ტაიპ ერდოანმა განაცხადა, რომ ეკონომიკური მმოსაზრებების გამო ის სოლიდარობას უცხადებს რუსეთს და ასევე ენდობა უკრაინის წინააღმდეგ ომის “სწრაფი შეწყვეტის” შესახებ რუსეთის ლიდერის ვლადიმერ პუტინის ნათქვამ სიტყვებს.
ამის შესახებ ერდოანმა 19 სექტემბერს გავრცელებულ ამერიკულ საზოგადოებრივ მაუწყებელთან (PBS) ინტერვიუში განაცხადა.
“ჩვენ ბუნებრივი აირის ნახევარს რუსეთიდან ვიღებთ, რაც იმას ნიშნავს, რომ სოლიდარულები ვართ. ჩვენ ორმხრივ ნაბიჯებს ვდგამთ სამომავლოდ და თავდაცვის ინდუსტრიაშიც ვთანამშრომლობთ. ჩვენ შეგვიძლია ეს ყველაფერი რუსეთთან ერთად ვაკეთოთ”, – განაცხადა ერდოანმა.
მას ასევე სჯერა, რომ უკრაინაში ომი დიდხანს გაგრძელდება, მაგრამ ” პუტინი რეალურად ემხრობა იმას, რომ ეს ომი რაც შეიძლება მალე დასრულდეს.”
ჟურნალისტ ამნა ნავაზის კომენტარზე, რომ “ამაზე არ მიუთითებს არაფერი, რაც ბრძოლის ველზე ჩანს“, თურქეთის პრეზიდენტმა აღნიშნა, რომ ის უბრალოდ ითვალისწინებს ლიდერის (რუსეთის პრეზიდენტ ვლადიმერ პუტინს გულისხმობს) სიტყვებს.
“და ბატონი პუტინი ამ ომის რაც შეიძლება მალე დასრულების მმომხრეა. ეს არის ის, რაც მან თქვა. და მე მჯერა მისი სიტყვების,”- განაცხადა რეჯეპ ტაიპ ერდოანმა.
ნატოს სხვა ქვეყნებისგან განსხვავებით, უკრაინაში შეჭრის გამო თურქეთი რუსეთს არ უწესებს სანქციებს. მაგალითად, წელს თურქეთში ექსპორტზე გავიდა 14,3 მილიონი დოლარის ღირებულების ქვანახშირი, რომელიც რუსეთის მიერ ანექსირებულ უკრაინის ტერიტორიებზე იქნა მოპოვებული.
