რუსეთის კერძო გასამხედროებულ ჯგუფ “ვაგნერსა” და ქვეყნის ოფიციალურ შეიარაღებულ ძალებს შორის დაძაბულობის გაღრმავების ნიშნად, ევგენი პრიგოჟინის ხელმძღვანელობით მოქმედმა “ვაგნერმა” გამოაქვეყნა ვიდეოჩანაწერი, რომელზეც ტყვედ ჩავარდნილი რუსი ოფიცერია ასახული და ის “ვაგნერის” მებრძოლებზე თავდასხმის ბრძანების გაცემას “აღიარებს”.
ჩანაწერი, რომელიც “ვაგნერის” პრესსამსახურმა 4 ივნისს გაავრცელა, როგორც ჩანს, აჩვენებს დაკითხვას პირისა, რომელიც საკუთარ თავს უწოდებს პოლკოვნიკ რომან ვენევიტინს, მეთაურს რუსეთის შეიარაღებული ძალების 72-ე მსროლელი ბრიგადისა.
დაკითხვის პროცესში ის ამბობს, რომ “პიროვნული შუღლის” გამო გასცა “ვაგნერის” მებრძოლებზე თავდასხმის ბრძანება.
ამ ვიდეოჩანაწერის გამოქვეყნებამდე “ვაგნერის” პრესსამსახურმა გაავრცელა სამხედრო ანგარიში სროლის შესახებ “ვაგნერის” მებრძოლებსა და რუსეთის არმიას შორის, რომელიც, როგორც იუწყებოდნენ, მოხდა 17 მაისს, უკრაინის აღმოსავლეთის ქალაქ ბახმუტთან ახლოს. ბახმუტი ბოლო თვეებში იყო ეპიცენტრი შეტაკებებისა “ვაგნერის” მიერ მხარდაჭერილ რუსეთის ძალებს და უკრაინის არმიას შორის.
